Жеңіл атлетика әлемінің жарқын жұлдыздары 25 қаңтарда елордада өтетін 2025 жылғы маусымның World Athletics Indoor Tour Gold бірінші кезеңі Astana Indoor Meet for Amin Tuyakov Prizes-ке келеді. Бұл туралы ҚР Жеңіл атлетика федерациясының президенті Ольга Рыпакова мәлім етті. Қатысушылар арасында ямайкалық жүгіруші, 2024 жылы Парижде өткен Олимпиада ойындарының күміс жүлдегері Кишан Томпсон да бар. Ол Астанада жабық алаңдағы дебютін жасамақ. 23 жастағы Томпсон 60 метрге жүгіреді. Соңғы рет Париж Олимпиадасында жарысқа қатысып, 100 метрді 9,79 секундта жүгіріп өтіп, америкалық Ноа Лайлзбен тартысты бәсекеде күміс жүлдені жеңіп алды. Томпсонның Астанадағы 60 метрге жүгірудегі қарсыластары арасында 200 метрге жүгіруден Токио Олимпиадасының чемпионы канадалық Андре Де Грассе де бар. Де Грассе өткен жылы Қазақстанның бас қаласында өткен турнирде 6,66 секунд көрсеткішпен алтыншы орын алған болатын. Сондай-ақ Astana Indoor Meet for Amin Tuyakov Prizes сайысында жеңіл атлетика әлемінің басқа да жарқын өкілдері бақ сынасады.
Ольга Рыпакованың айтуынша, осы аптада Тұран даңғылы, 59 мекен-жайында орналасқан Qazaqstan жеңіл атлетика спорт кешенінде басталатын Қазақстан Республикасының жабық алаңдағы кубогі халықаралық жарысының негізгі репетициясы болады. 17-19 қаңтар аралығында оған еліміздің барлық өңірінен спортшылар қатысады. Спорт сүйер қауым мен жанкүйерлер доданы тамашалап, спортшыларымызға қолдау көрсете алады.
