2025 жылдың 14 қыркүйегінде Шымкент қаласында он жылдық тарихы бар дәстүрлі Shymkent Marathon өтеді. Бұл – күз мезгіліндегі ең ауқымды спорттық шаралардың бірі, ол жыл сайын мыңдаған қатысушыны біріктіріп, салауатты өмір салтын дәріптейтін маңызды оқиғаға айналды.
Биылғы мерейтойлық марафонда 6000-нан астам жүгіруші қатысады деп күтілуде. Олардың қатарында кәсіби спортшылар, әуесқойлар, студенттер, оқушылар, жанұялар және корпоративтік командалар бар. Ерекше балалардың да ата-аналарымен жүгіруіне мүмкіндік бар.
Сонымен қатар, жеңіл атлетика бойынша спорт мектептерінің тәрбиеленушілеріне және 2025 жылғы республикалық шоссе жарысына қатысушыларға тегін слоттар ұсынылады.
Тіркеу ресми сайтта жүргізілуде: shymkent-marathon.kz
Қатысушылар орны шектеулі.
Қатысуға болатын қашықтықтар:
5 км
10 км
21 км (жарты марафон)
42 км (толық марафон)
Командалық эстафета
Скандинавиялық жүріс
Дәстүрлі түрде, марафонға ерекше қажеттіліктері бар балалар да қатысады. Олар ата-аналарымен бірге жарыс жолына шығып, спорттың бәріне ортақ екенін дәлелдейді.
Shymkent Marathon – 10 жылдық спорттық мерекенің символы
Shymkent Marathon алғаш рет 2015 жылы өткізілді. Сол уақыттан бері бұл жарыс тек жүгіру сайысы ғана емес, Шымкент қаласының спорттық және мәдени өмірінің маңызды бөлігіне айналды.
2018 жылы «Шымкент-Марафон» қоғамдық қоры құрылып, марафонның ауқымы кеңейді. Сол жылы бағдарламаға толық марафон – 42,2 км қашықтық енгізілді.
Биылғы мерейтойлық марафон ерекше болмақ – қатысушыларды жаңа медаль дизайны, мерекелік атмосфера және көрермендер үшін кеңейтілген ойын-сауық бағдарламасы күтеді. Жүгіру маршруты қала орталығымен өтетіндіктен, қатысушылар мен көрермендерге үлкен мерекелік сезім сыйлайды.
Shymkent Marathon Шымкент қаласы әкімдігінің және қалалық қызметтердің қолдауымен ұйымдастырылады.
