Алматы қаласында Алматы жеңіл атлетика федерациясының президенті Айбек Нұрбеков, Қазақстан Республикасы Жеңіл атлетика федерациясының бас хатшысы Келбет Нұрғазина және 2000 жылғы Сидней Олимпиадасының чемпионы, еліміздің даңқты атлеті Ольга Шишигина арасында арнайы кездесу өтті.
Жиын барысында өңірдегі жеңіл атлетиканы дамыту стратегиясы, балалар мен жасөспірімдер спортының қолжетімділігін арттыру, сондай-ақ жас спортшыларды қолдау тетіктерін жетілдіру мәселелері кеңінен талқыланды. Сонымен қатар Алматы қаласында жеңіл атлетиканы бұқаралық спорт ретінде дамыту, мектеп спортын күшейту және заманауи жаттығу әдістемелерін енгізу бағыттары да күн тәртібіне қойылды.
Алматы қалалық жеңіл атлетика федерациясының басшысы Айбек Нұрбеков еліміздің спорт тарихында ерекше орны бар Ольга Шишигинаның жетістіктерін атап өтті. Спорт саңлағының тәжірибесі мен кәсіби жолы қазіргі жас атлеттер үшін маңызды мотивациялық ресурс екенін жеткізді. Оның халықаралық деңгейдегі спорттық мұрасы Қазақстандағы жеңіл атлетиканың беделін арттыруға үлкен үлес қосатынын айтты. Кездесу қорытындысы бойынша Ольга Шишигина Алматы қалалық жеңіл атлетика федерациясының Құрметті президенті болып тағайындалды. Бұл шешім оның отандық спортты дамытуға қосқан зор еңбегін мойындау әрі болашақ жобаларға тәжірибесін тарту мақсатында қабылданды.
Жиын соңында тараптар алдағы уақытта бірлескен оқу-жаттығу жобаларын, жастарға арналған мотивациялық кездесулерді және халықаралық деңгейдегі спорттық бастамаларды күшейтуге ниетті екенін білдірді.
