Қытайдың Шаосин қаласында өтіп жатқан эстафеталық жүгіруден Азия чемпионатында Қазақстан әйелдер құрамасы жүлдегерлер қатарынан көрінді.
17–22 маусым аралығында ұйымдастырылып жатқан құрлықтық додаға Азияның 9 елінен 105 спортшы қатысуда. Жарыс бағдарламасында эстафеталық жүгірудің бірнеше дисциплинасы бойынша медальдар сарапқа салынуда.
Қазақстан әйелдер құрамасы 4×400 метр эстафетада сәтті өнер көрсетіп, қола медаль жеңіп алды. Финалдық сында ұлттық құрама 3:33.87 нәтижесін тіркеп, үздік үштікті түйіндеді. Аталған дисциплинада ел намысын Анна Шумило, Мария Шувалова, Александра Залюбовская және Аделина Земс қорғады.
Финал қорытындысы бойынша Вьетнам құрамасы 3:31.16 нәтижесімен алтын медаль иеленсе, Қытай командасы 3:32.68 көрсеткішімен күміс жүлдегер атанды.
Айта кетейік, Қазақстан құрамасы бұған дейін аралас 4×400 метр эстафетада алтын медаль жеңіп алған болатын.
Қазақстан жеңіл атлетика федерациясының бас серіктесі — «Самұрық-Қазына» АҚ, серіктес — туризм индустриясы мен спортты қолдау қоры «Sport Qory».
